Vajtimet, 5

Kapitulli ka 22 vargje, lexim të këndshëm.

Vajtimet 5:1
Kujto, o Zot, atë që na ka ndodhur, shiko dhe vër re turpin tonë.

Vajtimet 5:2
Trashëgimia jonë u ka kaluar të huajve, shtëpitë tona njerëzve që nuk janë tanët.

Vajtimet 5:3
Ne u bëmë jetimë, pa etër, nënat tona janë si të veja.

Vajtimet 5:4
Duhet të paguajmë për ujët që pimë, drutë tona i kemi vetëm me pagesë.

Vajtimet 5:5
Na ndjekin me një zgjedhë mbi qafë, jemi të rraskapitur dhe nuk kemi fare pushim.

Vajtimet 5:6
I kemi shtrirë dorën Egjiptit dhe Asirisë për t`u ngopur me bukë.

Vajtimet 5:7
Etërit tanë kanë mëkatuar dhe nuk janë më, dhe ne mbajmë ndëshkimin për paudhësitë e tyre.

Vajtimet 5:8
Skllevërit sundojnë mbi ne, askush nuk mund të na çlirojë nga duart e tyre.

Vajtimet 5:9
E nxjerrim bukën duke rrezikuar jetën tonë, përpara shpatës së shkretëtirës.

Vajtimet 5:10
Lëkura jonë është ngrohur si në një furrë për shkak të valës së urisë.

Vajtimet 5:11
Kanë dhunuar gratë në Sion, virgjëreshat në qytetet e Judës.

Vajtimet 5:12
Krerët janë varur nga duart e tyre, personi i pleqëve nuk është respektuar.

Vajtimet 5:13
Të rinjtë i vunë të bluajnë, të vegjëlit u rrëzuan nën barrën e druve.

Vajtimet 5:14
Pleqtë nuk mblidhen më te porta, të rinjtë nuk u bien më veglave të tyre.

Vajtimet 5:15
Gëzimi i zemrave tona është pakësuar, vallja jonë është shndërruar në zi.

Vajtimet 5:16
Kurora ka rënë nga koka jonë; mjerë ne, sepse kemi mëkatuar!

Vajtimet 5:17
Prandaj u sëmur zemra jonë, për këto gjëra na janë errësuar sytë:

Vajtimet 5:18
për malin e Sionit që është i shkretuar dhe në të cilin sillen dhelprat.

Vajtimet 5:19
Por ti, o Zot, mbetesh për jetë, dhe froni yt brez pas brezi.

Vajtimet 5:20
Pse do të na harroje për jetë dhe do të na braktisje për një kohë të gjatë?

Vajtimet 5:21
Na bëj që të rikthehemi te ti, o Zot, dhe ne do të kthehemi; rivendos ditët tona si në të kaluarën.

Vajtimet 5:22
Mos vallë na hodhe poshtë fare apo je zemëruar me të madhe kundër nesh?