Fjalët e Urta, 18

Kapitulli ka 24 vargje, lexim të këndshëm.

Fjalët e Urta 18:1
Kush veçohet kërkon kënaqësinë e tij dhe zemërohet kundër gjithë diturisë së vërtetë.

Fjalët e Urta 18:2
Budallai nuk gjen kënaqësi te maturia, por vetëm në të vënit në dukje të zemrës së tij.

Fjalët e Urta 18:3
Kur vjen i pabesi vjen edhe përçmimi dhe bashkë me humbjen e nderit vjen turpi.

Fjalët e Urta 18:4
Fjalët e gojës së një njeriu janë ujëra të thella; burimi i diturisë është si një rrjedhë uji që shkon duke gurgulluar.

Fjalët e Urta 18:5
Nuk është mirë të preferosh të pabesin, apo të shkaktosh humbjen e të drejtit në gjyq.

Fjalët e Urta 18:6
Buzët e budallait të çojnë në grindje, dhe goja e tij kërkon goditje.

Fjalët e Urta 18:7
Goja e budallait është shkatërrimi i tij dhe buzët e tij janë një lak për jetën e tij.

Fjalët e Urta 18:8
Fjalët e shpifësit janë si një gjellë shumë e shijshme që zbret thellë në zorrë.

Fjalët e Urta 18:9
Edhe ai që është përtac në punën e tij është vëlla i planprishësit.

Fjalët e Urta 18:10
Emri i Zotit është një kala e fortë, tek ai turret i drejti dhe gjen siguri.

Fjalët e Urta 18:11
Pasuria e kamësit është qyteti i tij i fortë dhe simbas mendimit të tij ajo është si një mur i lartë.

Fjalët e Urta 18:12
Përpara shkatërrimit, zemra e njeriut ngrihet, por para lavdisë vjen përulësia.

Fjalët e Urta 18:13
Kush jep përgjigje për një çështje para se ta ketë dëgjuar, tregon marrëzinë e tij për turp të vet.

Fjalët e Urta 18:14
Fryma e njeriut i jep krahë në sëmundjen e tij, por kush mund ta ngrerë një frymë të demoralizuar?

Fjalët e Urta 18:15
Zemra e njeriut të matur fiton dituri, edhe veshi i të urtëve kërkon diturinë.

Fjalët e Urta 18:16
Dhurata e njeriut i hap rrugën dhe e çon në prani të të mëdhenjve.

Fjalët e Urta 18:17
I pari që mbron çështjen e vet duket sikur ka të drejtë; por pastaj vjen tjetri dhe e shqyrton.

Fjalët e Urta 18:18
Fati u jep fund grindjeve dhe i ndan të fuqishmit.

Fjalët e Urta 18:19
Një vëlla i fyer është si një qytet i fortë; dhe grindjet janë si shulat e një kalaje.

Fjalët e Urta 18:20
Njeriu e ngop barkun me frytin e gojës së tij, ai ngopet me prodhimin e buzëve të tij.

Fjalët e Urta 18:21
Vdekja dhe jeta janë nën pushtetin e gjuhës; ata që e duan do të hanë frytet e saj.

Fjalët e Urta 18:22
Kush ka gjetur grua ka gjetur një gjë të mirë dhe ka siguruar një favor nga Zoti.

Fjalët e Urta 18:23
I varfëri flet duke u lutur, kurse i pasuri përgjigjet me ashpërsi.

Fjalët e Urta 18:24
Njeriu që ka shumë miq duhet gjithashtu të tregohet mik, por është një mik që është më i lidhur se një vëlla.